,آلنمین, ,یازیسی,
آییلاندادا ایندیلر یوخودان
هوش آزیب، تاپانمیرام أوزومی
بیلمیرم هاردایام، بورا هارادیر
ائو - ائشیک یاد گلیر هله گؤزومه
ائله بیر[1] قالمیشام کئچنلرده
دئییرم بس، گنه همان آدامام
گنه سابق کیمی ادارهم وار
تلهسیک ایستیرم دورام، باخیرام
بئل- بوخوم، قول-قیچیم داها قاخمیر
داها قدرت یوخوم، دوروم آیاغا.
******
قوجالیق هئچ هله یادیمدا دهییل
دئییرم بس گنه نوخوشلامیشام
ایستیرم سسلهیم گنه خانیمی
که داوان وار گتیر، گنه نوخوشام.
******
آمما، ائو سانکی قبیستاندیر[2]
هوپ توتوب قیزلارین خیغان ویغانی
نه کوسوبلر که هئچ دانیشمیرلار
هئچ خانیمدان دا سس صدا یوخدیر
ائله بیل ، بیرده سیلکهلیرله منی
هوشوم، آزمیش یولون قانیب قاییدیر
أوزومی آختاریب: گنه تاپیرام
اوخونور آنجاق ,آلنمین, ,یازیسی,.
******
بوردا، بیردن چوکور قارانلیقلار
سانکی دام - داش اوچور منیم باشیما
قالمیشام دام-دیوارلار آلتیندا
بیر قارانلیق قبیردهیم که، داها
هئچ طرفدن ایشیقلیغیم یوخدیر.
******
ابچهریم سانکی اوز سسیمله دئییر:
سن أولوبکن، قبیرده خوتدامیسان
نه خانیم؟ آروادین اون ایلدی أواوب!
آروادین أولدی، قیزلارین کؤچدی
قوجالیق گلدی، قلعهنی آلدی
سنی کور قوش کیمی، باسیب قفسه
نه قویوبسان، عمی، نه آختاریسان؟!
بیر کسین قالماییب، هامی گئتدی
قوجادا سن کیمی غریب اولماز
قوجالار ایچرهده یتیم سنسن
سنایمیشسن أولن، خانیم دیریلیب.
******
یارامین کؤزمهسی قوپوب آجیشیر
هر زادین ضدیده أوزیله گلر
قرهگون، آغ گونی سالیر یادیما
سینهمین سازلاری سیزیلدیرلار.
******
دیبده قلبیمده زار-زار آغلیاراق
فارسی بیر قطعه وار، دوشور یادیما
«آذر بیگدلی» بئلم یازمیش
او یازیقدا منیم حالیمدایمیش:
« پیرم و عادت طفلان دارم»
«با من این شوخی طبع ارزانی»
« وقتی از خنده مرا گلریزی»
« وقتی از گریه، گلاب افشانی»
« اگرم خنده، نه از بیخردی»
« وگرم گریه، نه از نادانی»
« اولم خنده ز بیدردی بود»
« وآخرم گریه ز بیدرمانی»
منبع:
شهریار، سید محمد حسین، دیوان ترکی شهریار،انتشارات زرین و انتشارات نگاه، چاپ نهم، 1374، صص146 تا 148.
[1] . «ائله بیل» احتمالا مورد نظر بوده است که به صورت« ائله بیر» چاپ شده
[2] . همان « قبرستاندیر» بوده برای حفظ آهنگ شعر واژه محاورهای آورده شده.
مدرسه تاریخ...برچسب : نویسنده : ayazghic بازدید : 278